其實世事往往就係甘奇妙，老套d講，就係，當妳好努力想令到某d野發生，但如果個天覺得未係時候，妳點樣努力佢都始終係差一步。但如果個天覺得係時候要發生，就算妳唔去設計唔去plan，佢都係會發生。

記得在若干年前（正確來講應該係1999)，在本菇剛剛踏進呢個娛樂圈geh時候，好自然，當然就會作出多方面嘗試，於是就接左第一部戲“烈火青春”。好不幸，我個角色響出場十分鐘後就瓜左。自此，三年內每一部接過geh戲，無一部係真係知道自己應該做d咩，個角色諗緊咩。經過一試，再試，然後緊接三番四次再多加個五輪geh打擊後，終於決定息影，兼且覺得自己都係疊埋心水唱歌算喇，我都係無演戲天份架喇。

不過，暗地裡，我心不死。好，演戲唔得，舞台劇，總得掛。因此，梁祝出現。梁祝，帶來兩位好好geh導演進來我生命，一位係梁祝戲劇導演司徒ROY，另外一位就係大家都好熟悉geh麥欣欣。就係佢地兩個引導之下，慢慢令到我對演戲geh興趣同埋信心翻曬黎，而且更加一步一步將我以前隱藏左響心裡面geh情感引導出來。呢個project, 發生在零五年，自此，某些經絡通左，身體默默在我工作中學習感受，學習關懷，學習留意身邊一切大小事情，人變得更敏銳，心亦變得更大了。

今晚同我一位伯樂傾計，我話，哈，我個路途都真係幾得意，好似總係咩都比其他人慢一兩步，人地做左一陣，我先慢慢開始做。隔左甘多年，先開始真係走進電影呢個世界。佢話，其實都唔係啊，有陣時，所有事情就係講timing。尤其係演戲，就係妳要有左一d經歷，一d回憶，一d人生，先可以qualify去做o個樣野。其實都係。有可能，如果“遊龍戲鳳”係響五年前出現，無經歷過梁祝，無認識到麥欣欣，無做到十日談，好大可能，我個演繹會係完全兩回事。然後，如果無“遊龍戲鳳”，我亦未必能夠做到最近呢個舞台劇，然後又未必著到o個d衫，某d細胞又可能打唔開，然後又未必可以轉化到而家呢個我。

所以，所有事情，原來真係有一條路線圖，要做到第10步，你就係要先經歷123456789，跳左一級，好大可能最後出來效果就係差個一點點。我好慶幸我從來唔係一個心急geh人，我亦好慶幸，機會來到，我已經用左十年時間來準備，然後準準甘將佢捉住。

先容許我在此講聲多謝（因為我覺得我都無咩機會上台講架喇，哈哈），多謝劉導演甘信任我甘愛護我甘sack我，設計左一個完全度身geh角色比我。因為“遊龍戲鳳”，我得到“女王辦公室”，得到“男人與女人之戰爭與和平”，得到“奪命金”，更得到呢個提名，得到呢條新開拓geh路。對我來講，呢一切係一個肯定，一個確認。

嘩嘩，睇黎有獎無講，我都已經賺突晒喇。哈，真係比林奕華講中，原來今年真係菇仔成熟時。